ابوظہبی (امت نیوز) عابد علی کی شاندار سنچری کی بدولت پاکستان اے ٹیم نے انگلینڈ لائنز کو چار روزہ میچ میں 4 وکٹوں سے شکست دے دی، فاتح ٹیم نے 312 رنز کا ہدف میچ کے چوتھے اور آخری روز دوسری اننگز میں 6 وکٹوں کے نقصان پر پورا کیا، عثمان صلاح الدین 77 رنز بنا کر آئوٹ ہوئے لیکن عابد علی ڈٹے رہے، انہوں نے 113 رنز کی دلکش اننگز کھیل کر انگلینڈ لائنز کی جیت کی امیدوں پر پانی پھیر دیا۔ بدھ کو ابوظہبی میں کھیلے گئے چار روزہ میچ کے آخری روز پاکستان اے ٹیم نے 132 رنز 2 کھلاڑی آئوٹ پر دوسری ادھوری اننگز دوبارہ شروع کی تو اسے کامیابی کیلئے مزید 180 رنز درکار تھے، عابد علی اور عثمان صلاح الدین نے محتاط انداز سے دن کا آغاز کیا، 172 کے سکور پر ڈومنک بیس نے عثمان کو آئوٹ کر کے اہم پارٹنرشپ توڑ دی، عثمان نے 77 رنز کی اننگز کھیلی، اس موقع پر کپتان محمد رضوان نے عابد علی کا ساتھ دیا۔