کراچی (اسٹاف رپورٹر) سائٹ ایریا اور گڈاپ میں تیزرفتار گاڑیوں نے 2 نوجوان کچل دیئے جبکہ دیگر 3 زخمی ہوگئے۔ اتحاد ٹاؤن میں مشین میں ہاتھ کٹنے سے نوجوان اور پاک کالونی میں دیوار گرنے سے بچہ جاں بحق ہوگیا۔ تفصیلات کے مطابق سائٹ ایریا کے علاقے حبیب بینک چورنگی فلائی اوور پر تیز رفتار گاڑی کی ٹکر سے موٹر سائیکل سوار 3افراد شدید زخمی ہو گئے،جنہیں فوری عباسی اسپتال منتقل کیا گیا، جہاں 28سالہ نعمان ولد امام دین زخموں کی تاب نہ لاتے ہوئے دم توڑ بیٹھا۔ پولیس نے بتایا کہ 25سالہ ذوالقرنین ولد شہباز اور 24سالہ عبدالمجید ولد عبدالغنی زیر علاج ہیں۔گڈاپ سٹی کے علاقے نوری آباد ٹول پلازہ کے قریب گاڑی کی ٹکر سے 20سالہ وقار ولد امین جاں بحق اور 26سالہ خالدولدجواد شدید زخمی ہوگیا، جسے اسپتال منتقل کر دیا گیا۔ اتحاد ٹاؤن کے علاقے بلدیہ رشید آبادگلی نمبر7میں کام کے دوران مشین میں ہاتھ آنے سے 22سالہ نصیر شدید زخمی ہو گیا، جس کو فوری سول اسپتال منتقل کیا گیا، جہاں وہ دوران علاج چل بسا۔ پاک کالونی کے علاقے بڑا بورڈ حسرت موہانی کالونی میں زیر تعمیر مکان کی دیوار گرنے سے ملبے تلے دب کر 8 سالہ زاہد ولد شاہد جاں بحق ہوگیا۔