کراچی (اسٹاف رپورٹر) چینی زبان کی تعلیم کیلئے جامعہ کراچی کے کنفیوشس انسٹیٹیوٹ اور آغا خان یونیورسٹی کے مابین معاہدہ ہوا ہے، جس پر کنفیوشس انسٹی ٹیوٹ کے چینی و پاکستانی ڈائریکٹرز اور آغا خان میڈیکل کالج کے ڈین نے دستخط کئے۔ معاہدے کے تحت جامعہ کراچی آغا خان یونیورسٹی کے میڈیکل کالج کے سال اول کے طلبہ کو چینی زبان سکھانے کیلئے چینی اساتذہ فراہم کرے گا۔ علاوہ ازیں شام کی کلاسز میں اساتذہ، فیکلٹی اور دیگر عملے کیلئے بھی چینی زبان کی تدریس کا انتظام کیا جائے گا۔