سکھر (نمائندہ امت) سکھر میں کار اور بھینس باڑے پر فائرنگ سے 2 افراد ہلاک اور 4 زخمی ہو گئے۔ گولیاں لگنے سے 4 بھینسیں بھی مر گئیں۔ تفصیلات کے مطابق سکھر کی تحصیل پنو عاقل کے علاقے سلطان پور میں مسلح افراد نے کار پر اندھا دھند فائرنگ کر دی، جس کے نتیجے میں کار میں سوار دو افراد مٹھل منگریو اور اصغر بھارو موقع پر دم توڑ گئے۔ جبکہ حملہ آور فرار ہونے میں کامیاب ہو گئے۔ پولیس نے مقتولین کی لاشیں تعلقہ اسپتال پہنچائیں جہاں ضروری کارروائی کے بعد ورثا کے حوالے کر دی گئیں۔ پولیس کے مطابق دشمنی پر واقعہ پیش آیا۔ مقتولین عدالت میں پیشی پر جا رہے تھے۔ دوسری جانب سکھر کے علاقے آباد لاکھا میں مسلح افراد کے ایک گروہ نے مقامی رہائشی فرید لاکھو کے بھینسوں کے باڑے پر حملہ کرکے اندھا دھند فائرنگ کردی جس کے نتیجے میں بھینسوں کے باڑے میں بیٹھے چار افراد زخمی ہوگئے جبکہ گولیاں لگنے سے لاکھوں روپے مالیت کی چار بھینسیں بھی مرگئیں زخمیوں کو سول اسپتال سکھر میں داخل کرا دیا گیا ہے۔ واقعہ دیرینہ تنازعہ کا شاخسانہ ہے واقعہ کے بعد زخمی افراد کے ورثا نے علاقے میں ملزمان کی گرفتاری کے لئے بھی مظاہرہ کیا۔