کراچی(اسٹاف رپورٹر) یوسی آفس میں بنے پانی کے ٹینک میں گر کر 4سالہ بچہ جاں بحق ہوگیا، جبکہ ناردرن بائی پاس پر نامعلوم گاڑی کی زد میں آکر شہری مارا گیا۔ تفصیلات کے مطابق اتحاد ٹاؤن کے علاقے گلشن غازی بلاک سی میں واقع یوسی آفس میں بنے پانی کے ٹینک میں کھیل کے دوران 4 سالہ عبدالوہاب ولد شاہ خالد گر کر جاں بحق ہوگیا۔ ہیڈ محرر شاہد نے بتایا کہ واقعہ یوسی 35 کے چیئرمین وقار تنولی کے آفس میں بغیر ڈھکن کے واٹر ٹینک میں پیش آیا، وہاب کھیل رہا تھا کہ ٹینک میں گر گیا۔ منگھوپیر کے علاقے ناردرن بائی پاس ہمدرد یونیورسٹی کے قریب تیز رفتار گاڑی کی ٹکر سے 40 سالہ اکبر ولد لال محمد موقع پر ہی جاں بحق ہوگیا۔ پولیس کا کہنا ہے کہ متوفی اسی علاقے کا رہائشی اور حادثے کے وقت سڑک عبور کررہا تھا۔ پولیس نے کارروائی کے بعد لاش ورثا کے حوالے کردی۔