اسلام آباد(مانیٹرنگ ڈیسک )نیوزی لینڈ نے پاکستان کو ابوظہبی ٹیسٹ میں شکست دیکر سیریز 1-2 سے اپنے نام کرلی۔49سال بعد یہ پہلا موقع ہے کہ نیوزی لینڈ نے اپنے ملک سے باہر ٹیسٹ سیریز میں پاکستان کو ہرایا۔ پاکستان اور نیوزی لینڈ کے درمیان تیسرا اور فیصلہ کن میچ ابوظہبی کے شیخ زید اسٹیڈیم میں کھیلا گیا، نیوزی لینڈ نے کھیل کے آخری روز 7وکٹ پر 353رنز بنانے کے بعد دوسری اننگز ڈکلیئر کردی اور پاکستان کو جیت کیلیے 280رنز کا ہدف دیا جس کے جواب میں قومی ٹیم 156رنز پر پویلین لوٹ گئی۔ہدف کے تعاقب میں پاکستانی بلے بازوں نے ایک بار پھر مایوس کن کارکردگی کا مظاہرہ کیا اور صرف 55رنز پر آدھی ٹیم پویلین واپس لوٹ گئی، ٹیسٹ کریئر کا آخری میچ کھیلنے والے محمد حفیظ اپنی آخری اننگز یادگار نہ بناسکے اور صرف 8رنز پر ہی ٹم ساؤتھی کو وکٹ دے بیٹھے۔ پچھلے میچ کے سنچری میکر اظہر علی بھی زیادہ دیر وکٹ پر نہیں رکے اور 5رنز بنانے کے بعد گرینڈ ہوم کا شکار بنے۔ ان فارم مڈل آرڈر بلے باز حارث سہیل بھی امیدوں پر پورا نہ اترسکے اور صرف 9رنزبنانے کے بعد ہی پویلین واپس لوٹ گئے، حارث کے آؤٹ ہونے کے بعد اگلی ہی گیند پر پہلی اننگز میں تھری فیگر اننگز کھیلنے والے اسد شفیق کھاتہ کھولے بغیر پویلین لوٹ گئے۔اوپننگ بلے باز امام الحق نے کچھ دیر مزاحمت کی لیکن 22رنز پر ان کی ہمت بھی جواب دے گئی۔ اس وقت کپتان سرفراز احمد اور بابر اعظم وکٹ پر موجود ہیں۔ کپتان سرفراز احمد بھی زیادہ دیر وکٹ پر نہ ٹہر سکے اور 28رنز بناکر ولیم سمر ویل کا شکار بنے۔ بلال آصف اور یاسر شاہ کو ٹم ساؤتھی نے پویلین بھیجا۔ بابراعظم نصف سنچری بنانے والے واحد کھلاڑی رہے، وہ 51رنز پر اعجاز پٹیل کا شکار بنے۔نیوزی لینڈ کی جانب سے ٹم ساؤتھی ، ولیم سمر ویل اور اعجاز پٹیل نے 3،3 وکٹیں حاصل کیں۔اس سے قبل کھیل کے آخری دن نیوزی لینڈ نے اننگز کا آغاز 272رنز 4کھلاڑیوں کے نقصان پر کیا تو کین ولیمسن بغیر کسی رن کا اضافہ کیے پویلین لوٹ گئے۔ کین ولیمسن کے 139رنز پر آؤٹ ہونے کے بعد نکولس نے نیوزی لینڈ کا اسکور آگے بڑھایا اور سنچری اسکور کی، نکولس نے 126رنز بنائے اور ناقابل شکست رہے۔ یاسر شاہ نے دوسری اننگز میں 4اور مجموعی طور پر میچ میں 7کھلاڑیوں کو پویلین کی راہ دکھائی۔ میچ کی پہلی اننگز میں نیوزی لینڈ کے 274رنز کے جواب میں پاکستان کی ٹیم 348رنز بناکر آؤٹ ہوگئی تھی۔ سیریزمیں 29وکٹ لینے پر یاسرشاہ مین آف دی سیریزقرارپائے۔