مظفرگڑھ (اے پی پی؍امت نیوز)مظفرگڑھ میں شوہر نے بیوی اور تین بیٹیوں کو تیز دھار آلے کے ذریعے بے دردی سے قتل کردیا۔ جنوبی پنجاب کے علاقے مظفر گڑھ میں چوہرے قتل کی لرزہ خیز واردات تحصیل علی پور کے تھانہ سیت پورکے علاقہ شاہی والا میں ہوئی ۔پولیس کے مطابق بدچلنی کے شبہ میں ملزم افضل نے بیوی اور 3 بیٹیوں کو بے دردی سے موت کے گھاٹ اتار دیا۔ ملزم افضل کو شک تھا کہ اس کی بیوی عذرا بی بی کے کسی اور کے ساتھ تعلقات ہیں۔ ملزم نے اسی شک کی بنیاد پر درندگی اور ظلم کی انتہا کرتے ہوئے اپنی بیوی عذرا اور تین بٹیوں 4 سالہ تسکین، 3سالہ مصباح اور 10 دن کی گڑیا کو تیز دھار آلہ سے قتل کر ڈالا ۔واقعہ کی اطلاع ملتے ہی ایس ایچ او تھانہ سیت پور اور ریسکیو ٹیم موقع پر پہنچ گئی۔ ایس ایچ او تھانہ سیت پور نے ملزم افضل کو گرفتار کرکے لاشوں کو پوسٹمارٹم کے لیے ہسپتال منتقل کر دیا۔ پولیس نے عذرا بی بی کے بھائی ارشاد حسین کی مدعیت میں مقدمہ درج کرلیاہے۔