کراچی (اسٹاف رپورٹر) آئی سی آئی پل پر تیز رفتار ٹرالر نے 2 موٹر سائیکلوں پر سوار 4 افراد کو روند ڈالا، جس کے نتیجے میں ایک نوجوان جاں بحق اور دیگر3 زخمی ہوگئے، جن کی حالت نازک ہے،پولیس نے ڈرائیور کو گرفتار کرلیا۔ تفصیلات کے مطابق ڈاکس کے علاقے آئی سی آئی پل پر تیز رفتار ٹرالر نے 2 موٹر سائیکلوں پر سوار 4 افراد کو روند ڈالا، حادثے میں چاروں شدید زخمی ہوگئے ،جبکہ ٹرالر ڈرائیور خطیب فرار ہونے کی کوشش کررہا تھا کہ پولیس نے موقع پر پہنچ کر اسے دھرلیا، پولیس زخمیوں کو قریبی اسپتال پہنچا رہی تھی کہ ایک نوجوان نے راستے میں دم توڑ دیا۔ ایس ایچ او پرویز سولنگی نے بتایا کہ جاں بحق نوجوان 17 سالہ کاشف احمد ولد احمد خان سعید آباد کا رہائشی تھا، جبکہ زخمیوں کی شناخت کاشان، وقاص اور رسول کے نام سے ہوئی، جو زیر علاج ہیں۔ پولیس نے کارروائی کے بعد لاش ورثا کے حوالے کردی۔