کراچی(اسٹاف رپورٹر) قائد آباد میں سیوریج لائن میں زوردار دھماکے کے نتیجے میں 4 افراد زخمی ہوگئے۔قائد آباد کے علاقے مسلم آباد کالونی میں واقع سیوریج لائن میں جمعہ کی رات اچانک زور دار دھماکہ ہوگیا، دھماکے سے علاقے میں خوف و ہراس پھیل گیا اور لوگ گھروں سے باہر نکل آئے، دھماکے کی آواز دور دور تک سنائی دی گئی، جبکہ دھماکے کے باعث موقع پر موجود چار افراد معمولی زخمی ہوگئے، جنہیں طبی امداد کے لئے قریبی نجی اسپتال منتقل کیا گیا، ایس ایچ او معراج انور نے بتایا کہ واقعہ مصالحہ والی گلی میں واقع سیوریج لائن میں گیس بھرنے کے نتیجے میں اس وقت پیش آیا جب دس سے زائد مین ہولز کے ڈھکن زور دار دھماکے سے زمین سے کئی فٹ ہوا میں اچھل کر قریب ہی جاگرے جس کے باعث موقع پر موجود چار افراد 22 سالہ احمد، 26 سالہ محمد اسلم، 29 سالہ سعید اور 22 سالہ اکبر معمولی زخمی ہوئے تھے جنہیں طبی امداد کے بعد گھروں کو روانہ کردیا گیا ہے۔