کراچی (اسٹاف رپورٹر) لیاقت آباد میں پولیس افسر کے بیٹے سمیت 5 رکنی قاتل ڈکیت گروپ پکڑا گیا، ملزمان سے اسلحہ اور 2 موٹرسائیکلوں سمیت 7 لاکھ مالیت کے سیونگ سرٹیفکیٹ، موبائل فونز ، لیپ ٹاپ اور دیگر سامان بھی ملا ہے۔ پولیس آپریشن میں مختلف علاقوں سے منشیات فروشوں اور اسٹریٹ کرمنلز سمیت 11 ملزمان کو گرفتار کرکے ان سے منشیات، گٹکا اور اسلحہ برآمد کیا گیا ہے۔ تفصیلات کے مطابق اینٹی کارلفٹنگ سیل پولیس نے لیاقت آباد ڈاکخانہ کے قریب کارروائی کرتے ہوئے 5 رکنی ڈکیت گروپ کو گرفتار کرکے اسلحہ اور موٹر سائیکل برآمد کرلی۔ ہمایوں ، اعظم ، آصف ، نادر خان اور کاشف نامی ملزمان 2005 سے اسٹریٹ کرائمز اور ڈکیتیوں کی وارداتیں کررہے تھے، ملزمان نے 13 سال کے دوران لاتعداد وارداتیں کی اور کئی بار گرفتار ہوکر جیل بھی گئے تھے، جیل سے رہائی کے بعد ملزمان دوبارہ وارداتیں شروع کردیتے تھے۔ ملزمان نے دوران تفتیش انکشاف کیا کہ وہ بقر عید کے دوران قربانی کے جانوروں کو گاڑیوں سمیت لوٹ کر جانور سستے داموں فروخت کردیتے تھے۔ ملزمان نے انکشاف کیا کہ انہوں نے سریے سے بھرا ٹرک بھی چھینا تھا اور سریا سستے داموں دکانوں پر فروخت کردیا تھا، جس میں ہمارے حصے میں فی کس 80 ہزار رقم آئی تھی۔ ملزمان نے دوران تفتیش2 افراد کو قتل کرنے کا بھی اعتراف کیا ہے۔ پولیس کا کہنا ہے کہ ملزمان نے اورنگی میں عمران ماشو نامی نوجوان اور ایک دکاندار کو مزاحمت پر قتل کردیا تھا۔ پولیس کا کہنا ہے کہ ملزم اعظم پولیس افسر کا بیٹا ہے، جس نے والد کی دوسری شادی کے بعد اسٹریٹ کرائم گروپ میں شامل ہوکر وارداتیں شروع کیں، ملزمان اغوا برائے تاوان کی وارداتوں میں بھی ملوث ہیں، جبکہ ملزمان 2پستول ، موٹر سائیکلیں ، سات لاکھ کے سیونگ سرٹیفکیٹ، 9 موبائل فونز ، 2 لیپ ٹاپ ، اسلحہ اور ایک ٹیبلیٹ بھی ملا ہے، ملزمان سے تفتیش کی جارہی ہے۔ دوسری جانب نیوکراچی پولیس نے ملزم فہیم عرف فنٹر عرف موالی کو گرفتار کرکے چرس برآمد کرلی۔ فریئر پولیس نے گٹکے کے کارخانے پر کارروائی کرکے 2 ملزمان عامر اور محسن کو گرفتار کرلیا اور بھاری مقدار میں گٹکا برآمد کرلیا۔ رضویہ پولیس نے 2ملزمان شاہد عظیم اور بابر قریشی کو گرفتار کرکے اسلحہ برآمد کرلیا۔ ملیر سٹی پولیس نے 3 ملزمان مصطفیٰ، تنویر خان اور اسد کو گرفتار کرکے اسلحہ برآمد کرلیا۔ گلبرگ پولیس نے 2 ملزمان فیضان اور محسن علی خان کو گرفتار کرکے اسلحہ برآمد کرلیا۔ گلستان جوہر پولیس نے ملزم نور اللہ کو گرفتار کرکے اسلحہ برآمد کرلیا۔ ابراہیم حیدری پولیس نے خاتون منشیات فروش عزت خان کو گرفتار کرکے منشیات برآمد کرلی ، سہراب گوٹھ پولیس نے ملزم نصیر کو گرفتار کرکے چرس برآمد کرلی۔