کراچی(اسٹاف رپورٹر) ٹریفک حادثات میں ایک شخص جاں بحق، جب کہ متوفی کے بھائی سمیت6 افراد زخمی ہوگئے، جن میں باپ،3بیٹے اور ایک خاتون بھی شامل ہے۔تفصیلات کے مطابق گڈاپ کے علاقے لکی سیمنٹ فیکٹری کے قریب گاڑی کی ٹکر سے موٹر سائیکل سوار 2 افراد زخمی ہوگئے، جن میں ایک اسپتال میں چل بسا۔اسپتال میں متوفی کی شناخت 36 سالہ حبیب ولد وارث جبکہ زخمی کی شناخت 23 سالہ صدام ولد وارث کے نام سے ہوئی۔پولیس کے مطابق دونوں بھائی نوشہرو فیروز کے رہائشی اور لکی سیمنٹ میں مزدوری کرتے تھے۔منگھو پیر کے علاقے حب کینال کے قریب ٹریفک حادثے میں خاتون ،مرد اور 3 بچے زخمی ہو گئے۔پولیس نے بتایا کہ زخمیوں کی شناخت 27 سالہ بشیر عالم ولد فیض عالم، اس کے تین بیٹوں 4 سالہ علی معاویہ ، 2سالہ سفیان معاویہ ، 6 سالہ محمد ولد بشیر عالم اور 22سالہ مریم دخترخوشحال خان کے نام سے ہوئی ہے ۔اورنگی کے علاقے مہاجر چوک کے قریب گھر میں 25سالہ فراز ولد آزاد جھلس کر زخمی ہوگیا۔