کراچی (اسٹاف رپورٹر) پاکستان رینجرز (سندھ) نے کندھ کوٹ میں مفت میڈیکل کیمپ لگایا جبکہ شکار پور میں واقع سچا کھنڈ گرد وارے کی تزئین و آرائش کاکام کیا۔ گوٹھ رئیس محمد حیات بمقام کچھوکیٹی پولیس چوکی میں لگائے گئے میڈیکل کیمپ میں مقامی افراد کو مفت طبی سہولیات مہیا کی گئیں۔ڈاکٹرز ٹیم نے خواتین اور بچوں سمیت 1300مریضوں کامعائنہ کیا اور انہیں مفت ادویات فراہم کیں۔ کیمپ میں ایکسرے، الٹراساؤنڈ، ای سی جی اور بلڈ شوگر ٹیسٹ کا بھی انتظام کیا گیا تھا۔اسی طرح رینجرز نے سچا کھنڈ گرد وارے کی تزئین و آرائش بھی کی۔ اس سلسلے میں عبادت گاہ کے کمروں، ہال اور فرش کی مرمت کے علاوہ اندرونی و بیرونی حصے میں رنگ و روغن اور صفائی کیساتھ بجلی فراہمی بھی یقینی بنائی گئی۔ سکھ کمیونٹی نے رینجرز سے اظہار تشکر اور اقلیتوں کیلئے سیکورٹی اقدامات پر اعتماد کا اظہار کیا۔