کراچی(اسٹاف رپورٹر) کوسٹ گارڈز نے گوادر میں کارروائی کے دوران 75 کلو گرام اعلیٰ کوالٹی کی کرسٹل ضبط کرکے ایک ملزم کو گرفتار کرلیا۔ ترجمان کے اعلامیے میں کہا گیا کہ پاکستان کوسٹ گارڈز کو خفیہ اطلاع ملی کہ گودار کے ساحلی علاقے سے منشیات بیرون ملک اسمگل کی جارہی ہے، جس پر کوسٹ گارڈ کی ٹیموں نے مختلف مقامات پر ناکے لگا کرچیکنگ شروع کردی، اسی دوران شاہجہان روڈ پر مشتبہ ہائی لکس کو روک کر تلاشی لی گئی تو اس کے خفیہ خانوں سے اعلی کوالٹی کی 75کلو گرام کرسٹل ہیروئن برآمد ہوئی، جسے تحویل میں لیکر گاڑی اور ایک ملزم کو حراست میں لے لیا گیا ہے۔ ترجمان نے بتایا کہ برآمد منشیات کی مالیت عالمی منڈی میں 83 کروڑ روپے سے زائد ہے۔