حیدرآباد(بیورو رپورٹ)حیدرآباد پولیس نے مبینہ مقابلے میں گھروں میں چوریاں کرنے والے ایک ڈاکو کوزخمی حالت میں گرفتار کر لیا، اسلحہ برآمد۔پولیس ترجمان کے مطابق پنیاری پولیس نے دوران پیٹرولنگ مسلم قبرستان کے قریب2 مشکوک موٹر سائیکل سواروں کو چیکنگ کے لئے روکا تو ملزمان نے پولیس پر فائرنگ کردی اور فرار ہونے کی کوشش کی جس پر پولیس نے جوابی کارروائی کرتے ہوئے ایک ملزم عارف ولد محمد عثمان گاہو سکنہ ماروی ٹاؤن بھٹائی نگر کو زخمی حالت میں گرفتارکرکے اس کے قبضے سے 30 بور پستول برآمد کر لیا۔ پولیس کے مطابق گرفتار زخمی ڈاکو عارف نسیم نگر، بھٹائی نگر، مٹیاری اور دیگر علاقوں میں متعدد سنگین وارداتوں میں ملوث رہا ہے، اس سے مزید تفتیش جاری ہے۔