کراچی (اسٹاف رپورٹر) نارتھ کراچی اور ڈیفنس میں نالے و چھت سے گر کر 2 بچے جاں بحق ہوگئے۔ تفصیلات کے مطابق خواجہ اجمیر نگری کے علاقے نارتھ کراچی سیکٹر فائیو سی تھری میں گھر کے قریب کھیلنے کے دوران 3 سالہ بچہ نالے میں گر کر ڈوب گیا،جس کی لاش علاقہ مکینوں نے نکال کر ایمبولینس کے ذریعے قریبی اسپتال پہنچائی، جہاں متوفی کی شناخت 3 سالہ الیان ولد شاہد کے نام سے ہوئی۔ورثا بغیر کارروائی کے لاش لے گئے۔ پولیس واقعے سے لاعلمی ظاہر کررہی ہے۔ گذری کے علاقے چاندنی چوک کے قریب رہائشی عمارت کی پانچویں منزل پر کھیلنے کے دوران 9 سالہ احمد ولد جاوید گر کر جاں بحق ہوگیا۔پولیس نےواقعے کی تفتیش شروع کردی ہے۔