دوست کے قتل میں ملوث دبئی پلٹ ملزم ایئر پورٹ سے گرفتار

کراچی (اسٹاف رپورٹر) ایئر پورٹ پولیس نے کراچی ہوائی اڈے سے دوست کے قتل میں ملوث مبینہ ملزم دھرلیا۔ مقتول کی اہلیہ کا کہنا ہے کہ ملزم مقتول کو قتل کر کے لاش پٹری پر پھینک کر فرار ہوگیا تھا، پولیس نے ملزم سے تفتیش شروع کردی۔ تفصیلات کے مطابق 20اکتوبر کو پی ٹی سی ایل کالونی ملیر ہالٹ میں پٹری سے شاہد نامی شخص کی لاش ملی تھی، جس کا مقدمہ مقتول کے دوست حسن کیخلاف ایئر پورٹ پورٹ تھانے میں درج ہوا تھا۔ مقدمے کے متن میں مقتول کی اہیلہ کا کہنا ہے کہ ملزم حسن اسکے شوہر کو قتل کرکے لاش پٹری پر پھینک کر فرار ہوگیا تھا، تاہم پولیس نے ہفتے کی رات گئے ملزم حسن کو دبئی سے کراچی آتے ہوئے گرفتار کرلیا۔ اس حوالے سے ایس آئی او انسپکٹر بشیر کورائی نے بتایا کہ مقتول شاہد اور ملزم حسن دوست اور ایجنٹ تھے، جو ویزوں کا کام کرتے تھے۔ ان کا مزید کہنا تھا کہ مقتول پی ٹی سی ایل کالونی جبکہ ملزم شاہ فیصل کالونی کے علاقے عظیم پورہ کا رہائشی ہے۔ پولیس ملزم سے تفتیش کررہی ہے۔