کراچی(اسٹاف رپورٹر) رینجرز، سی ٹی ڈی اور پولیس آپریشن میں اہلکار کے قاتلوں، مفرور، اسٹریٹ کرمنلز اور منشیات و گٹکا فروشوں سمیت 19ملزمان کو گرفتار کرکے اسلحہ، منشیات اور مضر صحت گٹکا برآمد کرلیا گیا۔ ترجمان رینجرز کے مطابق بلدیہ ٹاؤن، کلاکوٹ اور بلوچ کالونی میں کارروائیوں کے دوران لوٹ مار، ڈکیتی اور اسٹریٹ کرائم کی متعدد وارداتوں میں ملوث 6ملزمان کاشف، عبدالقیوم، اویس خان عرف لمبا، عدنان عرف قاسم چھوٹا، احسان عرف عابد اور عبد العزیز کو گرفتار کرکے غیر قانونی اسلحہ اور مسروقہ سامان برآمد کرکے ملزمان کو پولیس کے حوالے کردیا گیا۔ کاؤنٹر ٹیررازم ڈپارٹمنٹ(سی ٹی ڈی) نے ناظم آباد کے علاقے خاموش کالونی گجر نالہ کے قریب خفیہ اطلاع پر کارروائی کرتے ہو ئے2ملزمان عبید الرحمن اور ظاہر شاہ کو گرفتار کر کے اسلحہ برآمد کرلیا۔ ایس پی سی ٹی ڈی مرتضی بھٹو نے بتایا کہ ملزمان نے 2014میں گلبہار میں دوران ڈکیتی پولیس اہلکار اوشاق کو شہید اور ساجد کو فائرنگ کرکے زخمی کیا تھا۔ انہوں نے مزید بتایا کہ ملزمان کیخلاف دہشت گردی کے مقدمات درج ہیں، جبکہ ملزمان نے25سے زائد ڈکیتی و لوٹ مار کی وارداتوں کا اعتراف کیا ہے، ملزمان کے دیگر ساتھیوں کی گرفتاری کی لئے کارروائی جاری ہے۔ رضویہ پولیس نے ناظم آباد ذیشان پارک کے قریب مقابلے کے بعد شہری سے لوٹ مار کرنے والے ڈاکو عقیل کو زخمی حالت میں گرفتارکرکے اسلحہ، موٹرسائیکل اور نقدی برآمد کرلی، ملزم کا ساتھی جاوید فرار ہونے میں کامیاب ہوگیا۔ عوامی کالونی پولیس نےمفرورملزم انعام انصاری کو گرفتار کرلیا۔ سپرمارکیٹ پولیس نے2ملزمان غوث الدین عرف عمران اور شکیل کو گرفتار کرکے اسلحہ برآمد کرلیا۔ الفلاح پولیس نے گٹکا فروش منیر کو گرفتار کرکے گٹکا برآمد کرلیا۔ سکھن پولیس نے منشیات فروش اکرم کو گرفتار کرکےمنشیات برآمد کرلی۔ کورنگی صنعتی ایریا پولیس نے2 اسٹریٹ کرمنلزعمیر اور محمد عرفان کو گرفتار کرکے اسلحہ برآمد کرلیا۔ ڈاکس پولیس نے کارروائی کے دوران ملزم سیف اللہ، علی اورنثارکو گرفتار کرکے اسلحہ، منشیات اور کھارادر سے مسروقہ موٹرسائیکل برآمد کرلی۔