کراچی(اسٹاف رپورٹر) پی آئی بی میں آپریشن کے دوران 2دستی بم ،بارود سے بھری موٹر سائیکل پکڑی گئی ۔50مشتبہ افراد حراست میں لے لئے گئے۔ تفصیلات کے مطابق پرانی سبزی منڈی کے قریب سکھیا گوٹھ میں بدنام منشیات فروش درویش کے اڈے پر ہفتے و اتوار کی درمیانی شب آپریشن کیا گیا تھا ۔ اس دوران منشیات فروشوں نے پولیس پر فائرنگ کی اور دستی بم سے حملہ کردیا تھا ۔بم پھٹنے سے خوف وہراس پھیل گیا تھا ، جبکہ ملزمان فرار ہوگئے تھے ۔پولیس نے آپریشن کے دوران اڈے سے 2دستی بم اور بارود بھری موٹر سائیکل برآمد کر لی ۔ ڈی آئی جی ایسٹ زون عامر فاروقی بھی موقع پر پہنچ گئے، انہوں نے بتایا کہ بارود بھری موٹر سائیکل کو نیو ایئر نائٹ پرکسی مقام پر استعمال کیا جانا تھا۔بم ڈسپوزل اسکواڈ نے 10کلو بارودی مواد ناکارہ بنا دیا ۔انہوں نے بتایا کہ موٹر سائیکل کی ٹنکی میں بم رکھا ہوا تھا۔ بعد ازاں پولیس نے کرنال بستی میں ا ٓپریشن کرتے ہوئے 50مشتبہ افراد حراست میں لے لئے ۔ ا ٓئی جی سید کلیم امام نے ایس ایس پی شرقی سے تفصیلی پورٹ طلب کرلی ہے، جبکہ پولیس پارٹی اور بم ڈسپوزل اسکواڈ کیلئے ایک ایک لاکھ روپے انعام اور تعریفی اسناد کا اعلان کیا ہے۔