اٹک ( نامہ نگار ) قتل اور سنگین وارداتوں میں ملوث راولپنڈی پولیس کی حراست سے 5 خطرناک قیدیوں کی فرار کی کوشش ،4 کو دوبارہ گرفتار کرلیا گیا جبکہ ایک فرار ہونے میں کامیاب ہوگیا۔ تفصیلات کے مطابق پولیس راولپنڈی عدالتوں میں پیشی کے بعد قیدیوں کو واپس اٹک جیل لارہی تھی کہ اٹک واپس آتے وقت جھلا خان چوک کے قریب قیدی آپس میں لڑ پڑے قیدیوں کو چھڑانے کیلئے جوں ہی دروازہ کھولا گیا تو اسی اثناء میں 5قیدیوں نے پولیس ملازمین کی آنکھوں میں دھول جھونک کر بھاگنے کی کوشش کی۔ آر پی او راولپنڈی فیاض احمد دیو کی ہدایت پر ڈی پی او کی زیر نگرانی تھانہ صدر اٹک ایس ایچ او عاطف ستار نے پولیس کی بھاری نفری کے ہمراہ تمام علاقہ کی ناکہ بندی کر کے 4قیدی جو سنگین وارداتوں میں ملوث تھے کو جھلا چوک کے قریب سے دوبارہ گرفتار کر لیا گیا جبکہ محسن قتل کے الزام میں زیر دفعہ 302میں ملوث تھا فرار ہونے میں کامیاب ہو گیا ۔