جوکووچ کو قطر اوپن ٹینس میںاپ سیٹ شکست

دوحہ(امت نیوز) باٹسٹا ایگٹ اور ٹامس برڈچ فتوحات برقرار رکھتے ہوئے قطر اوپن ٹینس ٹورنامنٹ مینز سنگلز فائنل میں پہنچ گئے، نوویک جوکووچ سیمی فائنل میں شکست کے بعد ایونٹ سے باہر ہو گئے۔ قطر میں جاری ایونٹ میں کھیلے گئے مینز سنگلز سیمی فائنلز میں اسپینش کھلاڑی باٹسٹا ایگٹ نے عمدہ کارکردگی کا مظاہرہ کرتے ہوئے عالمی نمبر ایک سربین سٹار جوکووچ کو سخت مقابلے کے بعد 3-6، 7-6، (8-6) اور 6-4 سے اپ سیٹ شکست دے کر فائنل کیلئے کوالیفائی کیا، جمہوریہ چیک کے ٹامس برڈچ نے اٹالین کھلاڑی مارکو سیشناٹو کو 7-6 اور 6-3 سے ہرا کر فائنل میں جگہ بنائی۔ دوسری جانب کھیلے گئے مینز ڈبلز فائنل میں فرانسیسی کھلاڑی پائری ہیوز ہربرٹ اور بیلجیئم کے جوڑی دار ڈیوڈ گوفن نے شاندار کھیل پیش کرتے ہوئے روبن ہاس اور مڈل کوپ پر مشتمل ہالینڈ کی جوڑی کو سخت مقابلے کے بعد ٹائٹل جیتنے کا اعزاز حاصل کیا۔