لاہور(اسپورٹس رپورٹر)پی سی بی افسران کیلئے نئی لگژری گاڑیاں تیار ہیں۔ نئے ماڈٖل کی جاپانی کارز فراہم کی جائیگی۔ بورڈ نے نئے افسران کیلئے چار گاڑیاں خرید لی گئیں۔ رپورٹ کے مطابق پی سی بی عہدیداروں کیلئے نئی کاروں کا ’’تحفہ ‘‘تیار کر لیا گیا۔مینجنگ ڈائریکٹر وسیم خان، ڈائریکٹر میڈیا سمیع برنی اور چیف اسٹریٹجی امپلیمنٹیشن آفیسر شفقت نغمی کے ساتھ ڈائریکٹر ایچ آر خیام قیصر کیلیے بھی حال ہی میں 4 گاڑیاں خریدی گئی ہیں۔ ذرائع کے مطابق چیئرمین پی سی بی احسان مانی نے اپنے لیے نئی کار کی ضرورت محسوس نہیں کی۔خیام قیصر کے سوا دیگر تینوں عہدیداروں کی نئی تقرریاں ہوئی ہیں، سمیع برنی پیر کو چارج سنبھالیں گے، وہ بورڈ ہیڈکوارٹرز قذافی اسٹیڈیم میں دیگر عہدیداروں کے ساتھ میٹنگز کا سلسلہ جاری رکھیں گے، ایک ہفتے کی مصروفیات کے بعد سمیع برنی دوبارہ دبئی روانہ ہو جائیں گے، ان کی لاہور واپسی 4 فروری کو ہو گی۔