کراچی ( اسٹاف رپورٹر )پولیس نے شاہ لطیف میں مقابلے کے بعد دو زخمی ملزمان گرفتار کر لئے جبکہ دیگر کارروائیوں میں 10ملزم گرفتار کرکے اسلحہ ، منشیات اور دیگر سامان برآمد کرلیا ۔ تفصیلات کے مطابق پولیس نے سیکٹر 31 میں فائرنگ کے تبادلے کے بعد 2ملزمان ذیشان اور حمید کوزخمی حالت میں گرفتار کر لیا ایس ایچ او نیک محمد کھوسہ نے بتایا کہ ملزمان لوٹ مارکر رہے تھے پولیس کو دیکھ کر فائرنگ کردی جوابی فائرنگ سے دو ملزم زخمی ہو گئے جبکہ تیسرے ملزم گل عرف گگوکو بھی گرفتار کر لیا ۔ گرفتار ملزمان نے 18دسمبر کو درخشاں شادی ہال کے قریب ڈکیتی کی تھی اور مزاحمت پر سکیورٹی گارڈ کو فائرنگ سے زخمی کر دیا تھا ، جبکہ ملزم ذیشان نے 25دسمبر کو موبائل شاپ میں ڈکیتی کی جس کی سی سی ٹی وی فوٹیج کی مددسےشنا خت ہوئی ملزمان کے قبضے سے اسلحہ، مسروقہ موٹر سائیکل، لوٹا گیا سامان موبائل فونز اور نقدی برآمد ہوئی زخمی ملزمان کو اسپتال منتقل کیا گیا ۔ سعود آباد پولیس نے تین ملزمان طیب ، سلیم اور عطاءاللہ کو گرفتار کرکے بھاری مقدار میں گٹکا برآمد کرلیا، زمان ٹاؤن پولیس نے دو ملزمان عادل اور حسن سے منشیات برآمد کرلی ، گلبہار پولیس نے ملزم عادل سے واٹر ٹینکر برآمد کرلیا، گارڈن پولیس نے سرکاری تاروں سے بھری سوزوکی تحویل میں لے لی ، جبکہ ملزمان فرار ہوگئے ۔سہراب گوٹھ پولیس نے محمد اقبال سے اسلحہ برآمد کرلیا۔