سکس ریڈ ورلڈ کپ میں پاکستان کی ناقص کارکردگی

دوحہ(امت نیوز )آئی بی ایس ایف سکس ریڈ ورلڈ کپ 2019 کوالیفائنگ راؤنڈ ون میں پاکستان کا کوئی بھی کھلاڑی فائنل میں جگہ نہ بنا سکا، حارث طاہر اور ذوالفقار عبدالقادر کوارٹر فائنل میں شکست کے بعد ایونٹ سے باہر ہو گئے۔ قطر میں جاری کوالیفائنگ راؤنڈ ون میں کھیلے گئے راؤنڈ 32 میچز میں پاکستانی کیوئسٹ ذوالفقار عبدالقادر نے بھارتی کیوئسٹ شبہام کو 5-0 فریمز سے ہرا کر پری کوارٹر فائنل میں جگہ بنائی، پاکستان کے حارث طاہر نے افغانستان کے محمد ریاض سنزئی کو 5-1 فریمز سے زیر کر کے پری کوارٹر فائنل تک رسائی حاصل کی، پاکستان کے مبشر رضا نے بھارت کے ادتیا کو 5-0 فریمز سے شکست دے کر ایونٹ سے باہر کر دیا، اس کے بعد کھیلے گئے پری کوارٹر فائنلز میں پاکستانی کیوئسٹ حارث طاہر نے قطری کیوئسٹ عبدل محسن کو 5-0 فریمز سے ہرا کر کوارٹر فائنل کیلئے کوالیفائی کیا، پاکستان کے مبشر رضا کو پری کوارٹر فائنل میں بھارتی کیوئسٹ دھاوج ہاریا کے ہاتھوں کانٹے دار مقابلے کے بعد 5-4 فریمز سے شکست کا سامنا کرنا پڑا۔