کراچی (اسٹاف رپورٹر) پاک کالونی میں مکان سے معمر خاتون کی گلہ کٹی لاش برآمد ہوئی۔ تفصیلات کے مطابق پرانا گولیمار جوہر کالونی بسم اللہ ہوٹل کے قریب واقع مکان میں نامعلوم ملزمان گھسے اور گھر میں موجود معمر خاتون کے گلے پر چھری کا وار کر کے قتل کردیا اور فرار ہوگئے۔ ایس ایچ او حق نواز کے مطابق مقتولہ 80 سالہ حنیفہ زوجہ عبدالوحید گھر میں اپنے بھائی کیساتھ رہتی تھی اور ان کا بھائی معذور ہے۔انہوں نے کہا کہ بظاہر واقعہ ذاتی رنجش کا شاخسانہ معلوم ہوتا ہے، مزید تفتیش جاری ہے اور اطراف کے لوگوں کے بھی بیانات قلمبند کیے جارہے ہیں۔