ویانا(امت نیوز)آسٹریا کے پہاڑی علاقے میں واقع لخ ایم آرل برگ میں برفانی طوفان کی وجہ سے3جرمن اسکی انگ کھلاڑی ہلاک ہو گئے،چوتھے کو لاپتہ قرار دے دیا گیا ہے ۔آسٹرین صوبہ ورالبرگ کی پولیس کے مطابق جرمن کھلاڑی ٹورنگ اسکی انگ کیلئے ریزرٹ پہنچے تھے ۔اس کھیل کے دوران کھلاڑی اونچے مقامات سے چھلانگ لگانے کے علاوہ ڈھلوانی علاقے میں تیزی سے نیچے آتے ہیں۔ ہلاک ہونے والےتینوں مرد جنوب مغربی جرمنی کے علاقے بالائی سوابیا سے تعلق رکھتے ہیں اور ان کی لاشیں مقامی وقت کے مطابق رات 11 بجے ملیں۔جنوب مغربی جرمنی سے ہی تعلق رکھنے والا 28 سال عمر کا ایک اسکیئر لاپتہ ہے ۔گزشتہ ہفتے سوئٹزر لینڈ کے پہاڑی سلسلے الپس پر شدید برفباری ہوئی تھی اور اس کے بعد سوئس حکام نے علاقے میں طوفان کی پیش گوئی کی تھی جس کے بعد 6 ہزار فٹ بلندی پر واقع علاقوں کی تمام اہم سڑکوں کو آمد و رفت کیلئے بند کر دیا گیا تھا ۔ہفتہ کو طوفان کا خدشہ کی سطح 3سے بڑھا کر 5 کر دی گئی تھی۔