جوہانسبرگ(امت نیوز)سرفراز احمد نے پاکستان کی جانب سے ٹیسٹ میچ میں وکٹوں کے پیچھے زیادہ شکارز کا نیا ریکارڈ قائم کر دیا، وہ وکٹوں کے پیچھے زیادہ شکارز کرنے والے مشترکہ طور پر چوتھے وکٹ کیپر بن گئے ہیں، انہوں نے جنوبی افریقہ کے خلاف جاری تیسرے اور آخری ٹیسٹ میچ میں عمدہ وکٹ کیپنگ کا مظاہرہ کرتے ہوئے 10 شکارز کر کے یہ سنگ میل عبور کیا، انہوں نے دونوں اننگز میں 10 کیچز تھام کر سابق ہم وطن وکٹ کیپر راشد لطیف اور کامران اکمل کا ملک کی طرف سے ٹیسٹ میچ میں وکٹوں کے پیچھے زیادہ شکارز کا ریکارڈ توڑ دیا جنہوں نے 9، 9 شکارز کر رکھے تھے، سرفراز وکٹوں کے پیچھے 10 شکارز کر کے بھارتی وکٹ کیپر وریدھمن ساہا، ایڈم گلکرسٹ اور بوب ٹیلر کے ہم پلہ ہو گئے ہیں۔ یاد رہے کہ سرفراز نے اب تک 49 میچز میں وکٹوں کے پیچھے مجموعی طور پر 167 شکارز کر رکھے ہیں۔