پاکستان کےخلاف سیریز کا آغاز فتح سے کرینگے- ہاشم آملہ

پورٹ الزبتھ (خبر ایجنسی) جنوبی افریکن ٹیم کے مایہ ناز بلے باز ہاشم آملہ نے کہا ہے کہ پاکستان کو پہلے ون ڈے میچ میں شکست دیکر سیریز کا آغاز فاتحانہ انداز میں کرینگے۔ انہوں نے کہا کہ ان کی ٹیم مکمل طور پر فٹ اور بھر پور فارم میں ہے اور پاکستان کے خلاف ون ڈے سیریز کے پہلے میچ کے لئے میدان میں اترنے کو بے تاب ہے۔ اپنے ایک بیان میں ہاشم آملہ نے کہا کہ پاکستان کو ٹیسٹ سیریز میں کلین سوئپ کرنے کے بعد ان کی ٹیم کے اعتماد میں اضافہ ہوا ہے اور اب ان کی ٹیم گرین شرٹس کو ون ڈے سےریز میں بھی کلین سویپ کرنے کیلئے پر عزم ہے۔ انہوں نے کہا کہ پاکستان کو پہلے میچ میں شکست دیکر ون ڈے سیریز کا آغاز فاتحانہ انداز میں کرنا چاہتے ہیں تاہم انہوں نے ٹیم کو خبردار کیا ہے کہ اس مقصد کے حصول کیلئے پوری ٹیم کو سرتوڑ محنت کرنا ہوگی۔ واضح رہے کہ جنوبی افریقہ اور پاکستان کی کرکٹ ٹیموں کے درمیان پانچ ایک روزہ بین الاقوامی میچوں پر مشتمل سیریز کا آغاز 19 جنوری سے ہو گا، گرین شرٹس کو ٹیسٹ سیریز میں عبرتناک شکست کے بعد اب ون ڈے سیریز میں پروٹیز کا چیلنج درپیش ہو گا، پاکستان کو ٹیسٹ سیریز میں پروٹیز کے ہاتھوں 3-0سے وائٹ واش کا سامنا کرنا پڑا تھا۔ دونوں ٹیموں کے درمیان ون ڈے انٹرنیشنل کرکٹ سیریز کا پہلا میچ 19جنوری کو پورٹ الزبتھ، دوسرا میچ 22جنوری، تیسرا میچ 25جنوری، چوتھا میچ 27جنوری جبکہ پانچواں اور آخری میچ 30جنوری کو کھیلا جائیگا۔