کراچی (اسٹاف رپورٹر) شہر میں مختلف ٹریفک حادثات میں 2 افراد جاں بحق جبکہ 4 زخمی ہوگئے، کرنٹ لگنے سے ایک شخص جاں بحق ہو گیا۔ تفصیلات کے مطابق پاکستان بازار تھانے کی حدود اورنگی ٹاؤن گلشن بہار سیکٹر 14مین شارع قذافی پر تیز رفتار واٹر ٹینکر ڈرائیور سے بے قابو ہوکر گلشن بہار مارکیٹ میں قائم دکانوں میں جاگھسا جس کے نتیجے میں ڈرائیور سمیت تین افراد شدید زخمی ہوگئے، واقعہ کی اطلاع ملتے ہی پولیس نے موقع پر پہنچ کر ریسکیو ایمبولینس کے ذریعے زخمیوں کو طبی امداد کے لئے قریبی اسپتال منتقل کیا جہاں دوران علاج ایک زخمی 26 سالہ شیراز عرف منانے دم توڑ دیا۔ زخمیوں میں ڈرائیور بھی شامل ہے۔ ڈیفنس کے علاقے خیابان شمشیرمیں تیز رفتار موٹر سائیکل نامعلوم گاڑی سے ٹکرا گئی جس کے نتیجے میں موٹرسائیکل پر سوار دو افراد شدید زخمی ہوگئے۔ جنہیں جناح اسپتال پہنچایا، جہاں دوران علاج ایک زخمی ابرار ولد صدیق زخموں کی تاب نہ لاتے ہوئے جاں بحق ہوگیا،جبکہ زخمی سعید کی حالت خطرے سے باہر ہے۔ علاوہ ازیں گلشن معمار کے علاقے بلاک نمبر 8میں واقع گھر میں کام کے دوران کرنٹ لگنے سے 22سالہ رمیش ہلاک ہوگیا۔