اسلام آباد (نمائندہ خصوصی ۔نمائندہ امت)6وفاقی وزرا اوروزرائے مملکت ،ڈپٹی سپیکر قومی اسمبلی،سپیکرپنجاب اسمبلی سمیت الیکشن کمیشن نے 332 ارکان پارلیمنٹ کی رکنیت معطل کر دی۔ تفصیلات کے مطابق الیکشن کمیشن آف پاکستان نے چیف الیکشن کمشنر سردار محمد رضا کی منظوری کے بعد سالانہ گوشوارے نہ جمع کرانے والے 332 ارکان پارلیمنٹ کی رکنیت معطل کر دی ہے رکنیت معطل ہونے والوں میں وزیر اطلاعات فواد چوہدری، ڈپٹی اسپیکر قاسم سوری، امور کشمیر علی امین گنڈا پور اور وزیر داخلہ شہریار آفریدی شامل ہیں۔ اراکین پارلیمنٹ کے مالی اثاثوں کے گوشواروں کی تفصیلات جمع کرانے والی332 اراکین سینٹ اورقومی وصوبائی اسمبلیوں کی رکنیت معطل کردی، 1174 اراکین پارلیمنٹ میں سے 874نے تفصیلات جمع کرائیں، الیکشن کمیشن کے ارکان پارلیمنٹ کی رکنیت معطلی کے نوٹیفکیشن کے مطابق سینٹ کے 104اراکین میں سے 20 نے مالی گوشواروں کی تفصیلات جمع نہ کرائیں، قومی اسمبلی کے 342میں سے 72اراکین مالی گوشواروں کی تفصیل جمع نہ کرسکے، حکمران جماعت سے تعلق رکھنے والے وزیر اطلاعات فواد چوہدری ،ڈپٹی سپیکر قاسم سوری کی رکنیت معطل کر دی گئی، رکنیت معطلی کی زد سے وزیرمملکت برائے داخلہ شہریارآفریدی اور وزیرامور کشمیر علی امین گنڈا پور بھی بچ نا سکے، الیکشن کمیشن کے مطابق احسن اقبال ،علی اعوان اور غلام بی بی بھروانہ کی رکنیت بھی معطل کردی گئی، بی این پی کے سربراہ اختر مینگل اور وزیرصحت عامرمحمود کیانی کی رکنیت بھی معطل کر دی گئی، سپیکرپنجاب اسمبلی پرویز الہیٰ اوررکن پنجاب اسمبلی بلال یاسین اور مجتبیٰ شجاع رحمان کی رکنیت بھی معطل کر دی گئی، معطل ہونے والوں میں رکن قومی اسمبلی صداقت علی عباسی،چوہدری سالک حسین، وفاقی وزیر طارق بشیر چیمہ، وزیر خوراک صاحبزادہ سلطان محبوب،سرفراز بگٹی،ستارہ ایاز،اسحاق ڈار،شہزاد وسیم شامل ہیں، جاوید لطیف ،شوکت یوسفزئی،مائزہ حمید گجر کی بھی رکنیت معطل کر دی گئی۔