کراچی(اسٹاف رپورٹر) ٹریفک پولیس ایسٹ زون کی جانب سے شہریوں کو ٹریفک قوانین پر عمل کی ترغیب کیلئے مزار قائد پر آگاہی کیمپ لگایا گیا جہاں موٹر سائیکل سواروں میں ہیلمٹ اور بیک ویو مرر بھی تقسیم کئے گئے۔ کیمپ میں موجود ٹریفک افسران نے موٹر سائیکل سواروں کو بیک ویو مرر کے استعمال کے بارے میں ہدایات دیں ۔ایس ایس پی ٹریفک ایسٹ ملک ظفر اقبال نے کہا کہ مہم کے حوالےسے شہری اچھا رسپانس دے رہےہیں ۔ ٹریفک پولیس شہریوں کو حادثات سے بچانے کیلئے کوشاں ہے۔اس موقع پر ہنڈا اٹلس کے نمائندے نے بتایا کہ آج ہم نے ٹریفک پولیس کے ہمراہ 50ہیلمٹ اور بیک ویومرز تقسیم کئے ہیں ۔کیمپ میں ٹریفک افسران اور اہلکار بھی موجود تھے ۔