اسٹیل مل افسر پر تشدد کے الزام میں 30 ملزمان کیخلاف مقدمہ درج

کراچی (اسٹاف رپورٹر) اسٹیل ملز افسر پر تشدد اور جان سے مارنے کی دھمکیاں دینے پر 7نامزد سمیت 30ملزمان کخلاف پولیس نے مقدمہ درج کرلیا۔ تفصیلات کے مطابق پاکستان اسٹیل ملز کے ملازم زین جنجوعہ نے بن قاسم تھانے میں درخواست دیتے ہوئے موقف اختیار کیا کہ 17جنوری کو 25سے 30افراد دفتر میں آئے، اس وقت میں اپنے افسر عارف شیخ کے ہمراہ کمرے میں موجود تھا، انہوں نے مجھے باہر بھیج کر دروازہ بند کرلیا ،جس پر میں نے سیکورٹی انچارج کو طلب کرلیا اور انہوں نے کمرا کھلوایا جس کے بعد وہ افراد چلے گئے۔ بعدازاں افسر عارف شیخ نے بتایا کہ ملزمان نے مجھے تشدد کا نشانہ بنایا ہے، میری ٹائی کاٹ دی، چشمہ بھی توڑ دیا اور حبس بیجا میں رکھا۔ وہ کہہ رہے تھے کہ تیرے پاس فنڈ موجود ہے، جاری کیوں نہیں کرتے۔ انہوں نے مجھے جان سے مارنے کی دھمکیاں دیں اور وہ دفتر سے چلے گئے۔ ان کا کہنا تھا کہ میں مقدمہ درج کروانا چاہتا ہوں۔ پولیس نے بتایا کہ مدعی کی درخواست پر 7نامزد سمیت 30ملزمان کے خلاف مقدمہ نمبر 14/19زیر دفعہ 147 – 352 – 148 – 427 – 306 – 304 درج کرلیا ہے۔