شیرشاہ میں کمپریسر دھماکے سے شدید خوف و ہراس-مزدور زخمی

کراچی (اسٹاف رپورٹر) شیرشاہ کباڑی مارکیٹ کے گودام میں کمپریسر دھماکے سے شدید علاقے میں شدید خوف و ہراس پھیل گیا، جبکہ ٹکڑے لگنے سے ایک شخص زخمی بھی ہو گیا، بی ڈی ایس نے رپورٹ حکام کو ارسال کردی ہے۔ تفصیلات کے مطابق سائٹ بی کے علاقے شیر شاہ کباڑی مارکیٹ میں واقع گودام میں اچانک زور دار دھماکہ ہو گیا، جس سے علاقے میں شدید خوف و ہراس پھیل گیا۔ دھماکے کی اطلاع ملتے ہی پولیس رینجرز اور امدادی ٹیم موقع پر پہنچ گئی اور ایک زخمی کو سول اسپتال منتقل کردیا، جبکہ گودام گھیرے میں لے کر بم ڈسپوزل اسکواڈ طلب کیا گیا۔ ایس ایس پی ویسٹ شوکت کھٹیان نے بتایا کہ بی ڈی ایس رپورٹ میں کہا گیا ہے کہ کمپریسر کھول کر صاف کیا جارہا تھا کہ اس دوران گیس لیکج سے دھماکہ ہوا، جس میں 35سالہ مزدور سدھیر ولد سکندر زخمی ہوا، جس کی حالت خطرے سے باہر ہے۔ پولیس واقعے کی مزید تفتیش کر رہی ہے۔