میلبورن(امت نیوز) برطانوی کھلاڑی جمی مرے اور ان کے برازیلین جوڑی دار برونو سوریز فتوحات برقرار رکھتے ہوئے سال کے پہلے گرینڈ سلام ٹینس ٹورنامنٹ آسٹریلین اوپن مینز ڈبلز کوارٹر فائنل میں پہنچ گئے۔ پیر کو آسٹریلیا میں جاری میگا ایونٹ میں کھیلے گئے مینز ڈبلز پری کوارٹر فائنل میں جمی مرے اور برونو سوریز نے شاندار کھیل پیش کرتے ہوئے نیکولا میک ٹک اور کیون کرائٹز کو زبردست مقابلے کے بعد 6-7، 6-2 اور 7-5 سے زیر کر کے کوارٹر فائنل کیلئے کوالیفائی کیا، کوارٹر فائنل میں جمی مرے اور برونو سوریز کا مقابلہ جان پیئرز اور ہنری کونٹی نن سے ہو گا۔ ادھر خواتین کے ایونٹ میں عالمی نمبر ایک سیمونا ہالپ پری کوارٹر فائنل میں شکست کے بعد ٹائٹل کی دوڑ سے باہر ہو گئیں، سرینا ولیمز، کیرولینا پلسکووا، ایلینا سویتولینا اور ناؤمی اوساکا پیش قدمی برقرار رکھتے ہوئے سال کے پہلے گرینڈ سلام ٹینس ٹورنامنٹ آسٹریلین اوپن ویمنز سنگلز کوارٹر فائنل میں پہنچ گئیں۔ پیر کو کھیلے گئے ویمنز سنگلز پری کوارٹر فائنلز میں شہرہ آفاق امریکن سٹار اور 23 مرتبہ کی گرینڈ سلام چیمپئن سرینا ولیمز نے عمدہ کارکردگی کا مظاہرہ کیا۔
٭٭٭٭٭