لاہور(خبر ایجنسی )پی سی بی ویسٹ انڈیز ویمن کرکٹ ٹیم کے دورہ پاکستان کے اعلان کا منتظر ہے، پاکستان کرکٹ بورڈ نے ویسٹ انڈیز کرکٹ بورڈ کو ویمن ٹیموں کے تین ٹی ٹوئنٹی میچز کراچی میں کھیلنے کا پروگرام بھجوا رکھا ہے، پروگرام کے مطابق ویسٹ انڈیز ویمن کرکٹ ٹیم نے 26 جنوری کو کراچی پہنچنا ہے لیکن ابھی تک ویسٹ انڈین بورڈ نے کراچی میں کھیلنے کا باقاعدہ اعلان نہیں کیا۔ ذرائع کا کہنا ہے کہ آئندہ چند روز میں اس حوالے سے اعلان سامنے آسکتا ہے اور اس سلسلے میں ویسٹ انڈیز کرکٹ بورڈ ویسٹ انڈیز ویمن کرکٹ ٹیم سے دورہ پاکستان کیلئے مذاکرات کررہا ہے، ٹیم کی بیشتر کھلاڑی دورہ پاکستان کے حق میں ہیں ۔ ویسٹ انڈیز کی ٹیم کی کپتان اسٹیفی ٹیلر اپنی مصروفیت کی وجہ سے دورہ پاکستان کے دوران اپنی عدم دستیابی کے حوالے سے بورڈ کو اعتماد میں لے چکی ہیں اور ابھی تک ان کی جگہ نئی کپتان منتخب نہیں ہوسکیں۔ ترجمان پی سی بی کے مطابق ویسٹ انڈیز ویمن ٹیم کے میچز پاکستان میں کھیلنے پر بورڈ کے ساتھ بات چیت جاری ہے تاہم ابھی تک حتمی فیصلہ نہیں ہوا ۔