دورہ جنوبی افریقہ ورلڈ کپ کیلئے انتہائی اہم ہے-شعیب ملک

کیپ ٹائون (اسپورٹس ڈیسک )گزشتہ روز ورلڈ کپ ٹرافی کی تقریب رونمائی میں پاکستانی کپتان شعیب ملک اور جنوبی افریقا کے کپتان فاف ڈوپلیسی نے شرکت کی۔اس موقع پر شعیب ملک نے کہا کہ ہم آخری میچ جیت کر سیریز جیتنا چاہتے ہیں۔ انہوں نے کہا کہ یہ میرے کیریئر کا آخری ورلڈ کپ ہے، میگا ایونٹ میں تین چار ماہ باقی ہیں، کرکٹ کا ہر لمحہ بھرپور انجوائے کررہا ہوں۔شعیب ملک نے کہا کہ ورلڈ کپ اہم ایونٹ ہے تمام ممکنہ کھلاڑیوں کو ورلڈ کپ سے قبل آزما رہے ہیں، دورہ جنوبی افریقہ ورلڈ کپ کی تیاریوں کے لیے اہم ہے، گذشتہ دو سال سے پاکستانی ٹیم پرجوش کرکٹ کھیل رہی ہے، آخری میچ جیتنے کی کوشش کریں گے، کوشش کریں گے کہ جنوبی افریقا کو جلدی آؤٹ کریں اور امام اور بابر اعظم کی بیٹنگ فارم سے فائدہ اٹھائیں۔جنوبی افریقا اور پاکستان کے درمیان آخری سیریز نومبر2013 میں ہوئی تھی۔ مصباح الحق کی قیادت میں پاکستان نے سیریز دو ایک سے جیتی تھی۔