کراچی(اسپورٹس رپورٹر)کمشنر کراچی میراتھن ہارون گل نے جیت لی جبکہ ویمنز کیٹگری کی فاتح حرا مہوش رہیں ۔اتوارکوکمشنر کراچی مراتھن ریس کا آغاز معین خان اکیڈمی سے ہوا، جس میں شہریوں نے بڑھ چڑھ کر حصہ لیا ۔ایتھلیٹ دو دریا، E8 اور سی ویو سے ہوتے ہوئے دوبارہ معین خان اکیڈمی پہنچے ، مراتھن میں سیکڑوں ایتھلیٹس نے شرکت کی جس میں بڑی تعداد میں خواتین بھی شامل تھی ، کمشنر کراچی نے کہاکہ آئندہ سال میراتھن انٹرنیشنل سطح کی کرائیں گے۔ویمنزکیٹگر ی کی میراتھن 5 کلو میٹر جبکہ مینز کی ریس 10کلومیٹر پر مشتمل تھی، اوپن کیٹگری میں ہارون گل فاتح رہے ،ویمنز میں پہلی پوزیشن حرا مہوش نے حاصل کی۔وزیر اعلی سندھ مراد علی شاہ نے کامیاب کھلاڑیوں میں انعامات تقسیم کئے۔اس موقع پر میڈیا سے بات چیت کرتے ہوئے وزیر اعلی سندھ سید مراد علی شاہ نے کہا کہ کراچی کی رونقیں لوٹ آئی ہیں ۔25سال بعد ہونے والی کراچی سٹی میراتھن کا مقصد یکجہتی کی فضا کو برقرار رکھنا ہے ۔ قانون نافذ کرنے والے اداروں نے امن دشمنوں کو شکست دے دی ہے، پی ایس ایل کے موقع پر ہر ممکن سیکیورٹی فراہم کریں گے۔انہوں نے کہاکہ کراچی کا امن واپس لوٹ آیا ہے اور یہاں میراتھن ریس کا انعقاد خوش آئند ہے، یہ زبردست ایونٹ ہے۔انہوں نے کہا کہ پی ایس ایل کی دوبارہ میزبانی ملنا اعزاز کی بات ہے۔
٭٭٭٭٭