بابراعظم کی بہترین پرفارمنس ابھی نہیں دیکھی۔ مکی آرتھر

جوہانسبرگ (امت نیوز) قومی کرکٹ ٹیم کے ہیڈ کوچ مکی آرتھر نے بابر اعظم کو بہترین بلے باز قرار دیتے ہوئے کہا ہے کہ ابھی تک ہم نے نوجوان بلے باز کی بہترین پرفارمنس نہیں دیکھی۔ بابراعظم نے گزشتہ روز جنوبی افریقا کے خلاف دوسرے ٹی ٹوئنٹی میں 58 گیندوں پر 90 رنز کی شاندار اننگز کھیلی لیکن اس کے باوجود پاکستان 189 رنز کا ہدف حاصل نہیں کر سکا اور گرین شرٹس کو 7 رنز سے شکست کا سامنا کرنا پڑا۔ قومی ٹیم کے ہیڈ کوچ مکی آرتھر نے ایک ویب سائٹ کو اپنے انٹرویو میں کہا کہ مجھے ہمیشہ بابراعظم کی صلاحیتوں پر اعتماد رہا ہے۔ مکی آرتھر نے کہا کہ دو سال پہلے جب میں نے بابراعظم کو نیٹ میں پریکٹس کرتے دیکھا تو کہا تھا کہ بھارتی کپتان ویرات کوہلی کی طرح بہت آگے جائے گا لیکن دلچسپ بات یہ ہے کہ ہم نے ابھی تک بابراعظم کی بہترین پرفارمنس نہیں دیکھی۔ انہوں نے کہا کہ بابراعظم ایک نوجوان کھلاڑی سے ایک تجربہ کار بلے باز میں تبدیل ہو چکا ہے اور وہ بہت مضبوط اور فٹ ہے۔ ان کا مزید کہنا تھا مجھے پورا یقین ہے کہ بابراعظم بہت جلد انٹرنیشنل کرکٹ کے تمام فارمیٹس میں دنیا کے 5 بہترین بلے بازوں میں شامل ہو جائے گا۔ قومی ٹیم کے ہیڈ کوچ نے کہا کہ بابراعظم اعظم دن بدن بہتر سے بہتر ہوتے جا رہے ہیں اور انہوں نے جنوبی افریقہ کے خلاف تینوں فارمیٹس میں شاندار کارکردگی کے ذریعے خود پر ایشیا سے باہر اچھا پر فارم نہ کرنے سے متعلق منفی تاثر کو ختم کر دیا ہے۔
٭٭٭٭٭