عمران خان کا دستخط شدہ بیٹ اورگیند نیلام

جوہانسبرگ (خبر ایجنسی)پاکستان تحریک انصاف کے زیراہتمام سینچورین میں ڈیم کیلئے فنڈ ریزنگ تقریب میں 3 کروڑ 70 لاکھ روپے جمع ہو گئے۔تفصیلات کے مطابق پی ٹی آئی کے زیراہتمام سینچورین میں ڈیم کیلئے فنڈ ریزنگ تقریب کا انعقاد کیا گیا، سینٹر فیصل جاوید اس تقریب کے مہمان خصوصی تھے،تقریب میںکرکٹر رمیض راجہ اور پاکستان کرکٹ ٹیم کے کپتان شعیب ملک نے بھی شرکت کی۔تقریب میں وزیراعظم عمران خان کا دستخط شدہ بیٹ،گیند اور قومی کرکٹ ٹیم کا دستخط شدہ بیٹ نیلامی کیلئے پیش کیا گیا،تقریب میں پاکستانی کمیونٹی نے بھرپور شرکت کی۔ڈیم کیلئے فنڈ ریزنگ تقریب میں صرف2گھنٹے میں3کروڑ70 لاکھ روپے جمع ہو گئے، وزیراعظم کا دستخط شدہ بیٹ31 لاکھ 29 ہزار روپے میںجبکہ عمران خان کی دستخط شدہ گیند7 لاکھ30 ہزارروپے میں نیلام ہوئی۔تقریب میں قومی کرکٹ ٹیم کا دستخط شدہ بیٹ بھی نیلامی کیلئے پیش کیا گیاجو 15 لاکھ 64 ہزار روپے میں نیلام ہوا، تقریب میں ٹوٹل 3 کروڑ70 لاکھ روپے جمع ہوئے۔