کراچی (امت نیوز) پی ایس ایل کی فرنچائز ملتان سلطانز نے لیگ کے چوتھے ایڈیشن کیلئے قیس احمد کی جگہ آسٹریلیا کے کرس گرین کو اسکواڈ کا حصہ بنا لیا ہے۔ ملتان سلطانز نے گزشتہ برس منعقدہ ڈرافٹ کے دوران افغان لیگ اسپنر قیس احمد کو اسکواڈ کا حصہ بنایا تھا لیکن کچھ وجوہات کے سبب وہ لیگ کیلئے دستیاب نہیں ہوں گے۔ ملتان سلطانز نے قیس کی عدم دستیابی کو دیکھتے ہوئے ان کے متبادل کا اعلان کردیا ہے اور جنوبی افریقی نڑاد ا?سٹریلین کرکٹر کرس گرین کو اسکواڈ کا حصہ بنا لیا ہے۔ پی ایس ایل کی سلور کیٹیگری میں شامل کرس گرین 52 ٹی 20 میچوں میں 374 رنز بنانے کے ساتھ ساتھ 40 وکٹیں لینے کا بھی اعزاز رکھتے ہیں۔ وہ آسٹریلیا کی بگ بیش لیگ میں سڈنی تھنڈرز کی نمائندگی کر رہے تھے، لیکن تھنڈرز کے لیگ سے جلد اخراج کی بدولت اب وہ ملتان سلطانز کو پورے ایڈیشن کیلئے دستیاب ہوں گے۔ کرس گرین پاکستان سُپر لیگ میں اس سے قبل لاہور قلندرز کی بھی نمائندگی کر چکے ہیں۔
٭٭٭٭٭