خواتین کے عالمی دن پر ویمنز باکسنگ ٹورنامنٹ کا انعقاد

اسلام آباد (امت نیوز) سندھ باکسنگ ایسوسی ایشن کے زیراہتمام ویمنز انٹرنیشنل ڈے کے موقع پر ایک روزہ ویمنز باکسنگ ٹورنامنٹ 8 مارچ کو لیاری کراچی میں کھیلا جائے گا۔ سندھ باکسنگ ایسوسی ایشن کے جنرل سیکرٹری محمد اصغر بلوچ نے بتایاکہ ایونٹ کی تیاریاں زور شور پر ہیں۔ انہوں نے کہا کہ ایونٹ میں 8 کیٹگریز کے مقابلے رکھے گئے ہیں جن میں 48 کلوگرام، 51 کلوگرام، 54 کلوگرام، 57 کلوگرام، 60 کلوگرام، 64 کلوگرام، 69 کلوگرام اور 75 کلوگرام شامل ہیں۔ انہوں نے کہا کہ ایونٹ میں انڈر۔18 خواتین باکسرز کھلاڑی حصہ لیں گی۔ ایونٹ میں شرکت کرنے والی ٹیموں کی خواتین کھلاڑیوں کے ویٹ (وزن) 7 مارچ کو سہ پہر تین بجے سے 5 بجے تک ہونگے اور بعد میں منیجرز میٹنگ ہوگی جس میں ڈراز کا اعلان اور ٹورنامنٹ کے قوانین کے بارے میں آگاہ کیا جائیگا۔ انہوں نے کہا کہ ایونٹ کے دوران سندھ باکسنگ چیمپئن شپ کیلئے کراچی ٹیم کا چنائو بھی کیا جائے گا۔
٭٭٭٭٭