ابوظہبی (امت نیوز) شین واٹسن کو 400 چھکے لگانے کا اعزاز حاصلکوئٹہ گلیڈی ایٹرز کے آسٹریلوی بلے باز شین واٹسن نے ٹی ٹونٹی کرکٹ میں چھکوں کی چوتھی سنچری مکمل کر لی۔ وہ یہ اعزاز حاصل کرنے والے آسٹریلیا کے پہلے اور دنیا کے چوتھے بلے باز بن گئے ہیں۔ انہوں نے پاکستان سپر لیگ کے چوتھے ایڈیشن میں پشاور زلمی کے خلاف میچ میں جارحانہ بیٹنگ کا مظاہرہ کرتے ہوئے اننگز میں 6چھکے لگا کر یہ کارنامہ انجام دیا۔ اس سے قبل کرس گیل، کیرن پولارڈ اور برینڈن میک کولم بھی 400 چھکوں کے ہندسے کو عبور کر چکے ہیں۔ ٹی ٹونٹی کرکٹ کی تاریخ میں زیادہ چھکے لگانے کا عالمی اعزاز گیل کو حاصل ہے جنہوں نے 905 چھکے لگا رکھے ہیں۔ پولارڈ 578 چھکوں کے ساتھ دوسرے اور میک کولم 485 چھکوں کے ساتھ تیسرے نمبر پر موجود ہیں۔
٭٭٭٭٭