فیڈرر کی میامی اوپن ٹینس پیش قدمی جاری

میامی(امت نیوز) راجر فیڈرر، ڈینل مدودوف، فرانسز تیافوئے، ڈیوڈ گوفن، سٹیفانوس اور ڈینس شاپووالووو فتوحات برقرار رکھتے ہوئے میامی اوپن ٹینس ٹورنامنٹ مینز سنگلز پری کوارٹر فائنل میں پہنچ گئے۔ منگل کو امریکہ میں جاری ایونٹ میں کھیلے گئے مینز سنگلز تیسرے رائونڈ میچز میں شہرہ آفاق سوئس سٹار اور ریکارڈ 20 مرتبہ کے گرینڈ سلام چیمپئن راجر فیڈرر نے عمدہ کارکردگی کا مظاہرہ کرتے ہوئے حریف سربین کھلاڑی فلپ کریجی نووچ کو سٹریٹ سیٹس میں 7-5 اور 6-3 سے زیر کر کے پری کوارٹر فائنل میں جگہ بنائی، روسی کھلاڑی ڈینل مدودوف نے امریکن کھلاڑی ریلی اوپیلکا کو سخت مقابلے کے بعد ٹائی بریک پر 7-6، 6-7 اور 7-6 سے ہرا کر پری کوارٹر فائنل میں پہنچنے کا اعزاز حاصل کیا، امریکن کھلاڑی فرانس تیافوئے نے اسپینش کھلاڑی ڈیوڈ فیرر کو 5-7، 6-3 اور 6-3 سے شکست دے کر ایونٹ سے باہر کر دیا، فتح کے ساتھ ہی تیافوئے پری کوارٹر فائنل میں داخل ہو گئے، بیلجیئن کھلاڑی ڈیوڈ گوفن بھی تیسری رکاوٹ عبور کرنے میں کامیاب رہے۔
٭٭٭٭٭