مریم نواز نے ڈی جی پی آر کی نئی عمارت کی منظوری دے دی

صوبائی وزیر اطلاعات و ثقافت عظمیٰ زاہد بخاری نے ڈی جی پی آر کی کارکردگی اور مستقبل کے حوالے سے تفصیلی بریفنگ دی۔

September 3, 2026 · قومی
فوٹو سوشل میڈیا( ایکس)

فوٹو سوشل میڈیا( ایکس)

لاہور: وزیراعلیٰ پنجاب مریم نواز شریف نے ڈائریکٹوریٹ جنرل پبلک ریلیشنز کے ہیڈکوارٹرز کیلئے نئی عمارت تعمیر کرنے کی منظوری دے دی ہے۔

وزیراعلیٰ کی زیر صدارت خصوصی اجلاس ہوا، جس میں صوبائی وزیر اطلاعات و ثقافت عظمیٰ زاہد بخاری نے ڈی جی پی آر کی کارکردگی اور مستقبل کے حوالے سے تفصیلی بریفنگ دی۔

اجلاس میں مریم نواز شریف نے ڈی جی پی آر کی تنظیم نو کا حکم دیتے ہوئے ادارے کو جدید تقاضوں سے ہم آہنگ کرنے کی ہدایت کی۔ انہوں نے میڈیا اداروں کے واجبات کی ادائیگی کیلئے بھی فوری اقدامات کرنے کی ہدایت کی۔

وزیراعلیٰ نے ڈی جی پی آر کی کارکردگی جانچنے کیلئے تیسرے فریق سے آزادانہ جانچ کے نظام پر بھی زور دیا۔

اس موقع پر مریم نواز شریف نے کہا کہ عوام تک بروقت اور درست معلومات پہنچانے کیلئے جدید دور کے تقاضوں کو اپنانا ضروری ہے۔ ان کے مطابق ابلاغ اب صرف فن نہیں رہا بلکہ ایک باقاعدہ سائنس کی شکل اختیار کرچکا ہے۔

 

انہوں نے کہا کہ حکومت ڈی جی پی آر کو موجودہ دور کی ضروریات کے مطابق جدید ادارہ بنانا چاہتی ہے، کیونکہ اس وقت معلومات کی بھرمار کا دور ہے اور عوام تک درست معلومات پہنچانا پہلے سے زیادہ اہم ہوگیا ہے۔

مریم نواز نے مزید کہا کہ عوام کو حکومت کے فلاحی اقدامات سے مسلسل آگاہ رکھا جائے تاکہ وہ درست اور غلط معلومات میں فرق کرسکیں۔

وزیراعلیٰ نے صوبائی وزیر اطلاعات عظمیٰ زاہد بخاری کی کمیونیکیشن کے شعبے میں کارکردگی کو بھی سراہا۔

Facebook Twitter WhatsApp