حماداظہرعدالت میں پیش،پی ٹی آئی میں اندرونی اختلافات بھی شدت اختیارکر گئے

جناح ہاؤس حملہ کیس میں سابق وفاقی وزیر اور  تحریک انصاف رہنما حماد اظہر کو 21 روزہ جسمانی ریمانڈ مکمل ہونے کے بعد لاہور کی انسداد دہشت گردی عدالت میں پیش کر دیا گیا ہے۔ عدالت میں پیشی کے موقع پر حماد اظہر نے پریزن وین سے میڈیا سے مختصر گفتگو کرتے ہوئے کہا کہ وہ بانی پی ٹی آئی کے ساتھ ڈٹ کر کھڑے ہیں۔

دوسری جانب خیبر پختونخوا کی سیاسی صورتحال اور وزیراعلیٰ سے متعلق پارٹی کے اندرونی معاملات پر شدید تضادات سامنے آئے ہیں۔ پی ٹی آئی کے رہنما شیر افضل مروت نے تصدیق کی ہے کہ بانی پی ٹی آئی کا مبینہ پیغام سامنے آیا ہے جس کے مطابق اسلام آباد مارچ شاید وزیراعلیٰ کی صلاحیت سے زیادہ ہے اور انہیں عہدے سے ہٹ جانا چاہیے۔ رکن قومی اسمبلی کے دعوے کے مطابق بانی پی ٹی آئی نے سلمان صفدر کے ذریعے یہ پیغام بھجوایا تھا جبکہ اس معاملے پر بشریٰ بی بی اور نورین نیازی سے بھی گفتگو کی گئی۔ دعوے میں کہا گیا کہ علی امین گنڈاپور کی جانب سے پریشر گروپ تشکیل دینے اور تقریباً 35 ارکان اسمبلی کی بغاوت کی اطلاعات بھی موصول ہوئی ہیں۔

تاہم اس کے برعکس پی ٹی آئی کے چیئرمین بیرسٹر گوہر خان نے ان تمام خبروں کی سختی سے تردید کی ہے۔ بیرسٹر گوہر کا کہنا ہے کہ وزیراعلیٰ کو بانی پی ٹی آئی کا مکمل اعتماد حاصل ہے اور پارٹی ان کی مکمل حمایت کرے گی۔ انہوں نے اس بات پر زور دیا کہ موجودہ حالات ملک میں کشیدگی بڑھانے کے نہیں بلکہ حالات کو بہتر کرنے کے متقاضی ہیں اور صورتحال کو مزید خراب ہونے سے بچانے کے لیے تمام تر کوششیں جاری رکھی جا رہی ہیں۔