تین دن کی بندش کے بعد بابوسر ٹاپ روڈ ہر قسم کی ٹریفک کے لیے بحال

شدید برف باری کے باعث گزشتہ 3 دن سے بند رہنے والی بابوسر ٹاپ روڈ کو ٹریفک کی آمدورفت کے لیے بحال کر دیا گیا ہے۔ قومی شاہراہوں کی دیکھ بھال کرنے والے ادارے نیشنل ہائی وے اتھارٹی (این ایچ اے) کے عملے نے بروقت کارروائی کرتے ہوئے سڑک پر جمع برف کو کامیابی سے ہٹا دیا، جس کے بعد گلگت بلتستان اور خیبر پختونخوا دونوں اطراف سے ٹریفک کی روانی بحال ہو گئی ہے۔

پولیس حکام کے مطابق بابوسر ٹاپ روڈ روزانہ صبح سے شام 4 بجے تک ہر قسم کی ٹریفک کے لیے کھلی رہے گی۔ تاہم موسم کی شدت، شدید کہر اور ممکنہ خطرات کے پیش نظر شام 4 بجے کے بعد ہر قسم کی آمدورفت پر پابندی ہوگی تاکہ مسافروں اور سیاحوں کی جان و مال کے تحفظ کو یقینی بنایا جا سکے کیونکہ اس دشوار گزار پہاڑی راستے پر رات کے وقت سفر کرنا خطرناک ہو سکتا ہے۔

روڈ کی بحالی سے سیاحوں اور مقامی مسافروں نے شدید اطمینان کا اظہار کیا ہے جو گزشتہ چند دنوں سے راستے کی بندش کے باعث پھنسے ہوئے تھے۔ اب سیاح ایک بار پھر بابوسر ٹاپ کے برف پوش پہاڑوں، دلفریب قدرتی نظاروں اور خوشگوار سرد موسم سے بھرپور لطف اندوز ہو سکیں گے۔ متعلقہ انتظامیہ نے مسافروں کو ہدایت کی ہے کہ وہ سفر پر روانہ ہونے سے پہلے سڑک کی تازہ ترین صورتحال سے آگاہ رہیں اور مقررہ اوقات کار کی سختی سے پابندی کریں۔