وزیراعظم شہباز شریف کل پشاور کا دورہ کریں گے، امن و امان اور ترقیاتی امور پر اہم اجلاس ہوں گے

وزیر اعظم محمد شہباز شریف کل پشاور کا ایک روزہ دورہ کریں گے۔ گورنر خیبر پختونخوا فیصل کریم کنڈی کی دعوت پر ہونے والے اس دورے کے دوران وزیر اعظم صوبے میں امن و امان کی صورتحال اور ترقیاتی امور پر منعقدہ اعلیٰ سطح کے اجلاسوں کی صدارت کریں گے۔

سرکاری ذرائع کے مطابق وزیر اعظم کو صوبے میں دہشت گردوں اور فتنہ الخوارج کی سرکوبی کے لیے اٹھائے گئے اقدامات سے تفصیلی بریفنگ دی جائے گی، جبکہ سیکیورٹی ضروریات کا بھی جائزہ لیا جائے گا۔ اس کے علاوہ وزیراعظم ضم اضلاع اور 4 جنوبی اضلاع میں دہشت گردی کے خاتمے، پائیدار امن اور ترقی کے لیے قائم ایریا ریپریزنٹیٹو اینڈ ڈویلپمنٹ کونسل کے اراکین سے ملاقات کریں گے اور انہیں ان کے فرائض اور ترجیحات سے آگاہ کریں گے۔

گورنر خیبر پختونخوا فیصل کریم کنڈی دورے کے دوران وزیر اعظم کو صوبے کو درپیش اہم مسائل بالخصوص گندم و آٹے کی کمی، گیس اور بجلی کی غیر اعلانیہ لوڈشیڈنگ، امن و امان اور انفرااسٹرکچر کے امور سے آگاہ کریں گے۔

قبل ازیں پشاور میں میڈیا سے گفتگو کرتے ہوئے گورنر خیبر پختونخوا فیصل کریم کنڈی نے کہا کہ صوبے میں صفائی ستھرائی اور تجاوزات کے خلاف بلا امتیاز آپریشن کا آغاز کر دیا گیا ہے، جہاں کسی کی سفارش نہیں چلے گی۔ انہوں نے انکشاف کیا کہ گندم کے غائب ہونے کے معاملے پر انکوائری شروع کر دی گئی ہے جس کی رپورٹ جلد منظر عام پر لائی جائے گی۔ انہوں نے مزید کہا کہ بجلی اور گیس کی لوڈشیڈنگ کے خاتمے کے لیے متعلقہ اداروں سے بات چیت کی جائے گی اور وفاق کے ساتھ مل کر صوبے کے تمام مسائل کو خوش اسلوبی سے حل کیا جائے گا۔