بیوی پر تشدد اور زیور فروخت کرنے کے مقدمے میں اے سی سندھ ریونیو بورڈ جیل منتقل

کراچی کے جوڈیشل مجسٹریٹ جنوبی کی عدالت میں بیوی پر تشدد کرنے اور بھاری مالیت کا زیور فروخت کرنے کے مقدمے کی سماعت ہوئی، جہاں جسمانی ریمانڈ کی مدت مکمل ہونے پر سندھ ریونیو بورڈ کے اسسٹنٹ کمشنر اور ملزم ظفر احمد کلوڑ کو عدالت میں پیش کیا گیا۔

پولیس تفتیشی افسر نے عدالت کے روبرو مؤقف اختیار کیا کہ ملزم سے تفتیش کا عمل ابھی مکمل نہیں ہوا ہے، لہذا ملزم کے مزید جسمانی ریمانڈ کی استدعا کی جائے۔ تاہم عدالت نے تفتیشی افسر کی استدعا مسترد کرتے ہوئے ملزم ظفر احمد کلوڑ کو عدالتی ریمانڈ پر جیل بھیجنے کا حکم دے دیا۔

ایف آئی آر کے متن کے مطابق مدعیہ نے پولیس کو دیے گئے اپنے بیان میں مؤقف اختیار کیا تھا کہ اس کے شوہر نے میکے جانے سے منع کرنے پر اسے شدید تشدد کا نشانہ بنایا۔ مدعیہ کے بیان کے مطابق ملزم تشدد کے بعد اس کی 2 سالہ بیٹی اور قیمتی زیورات بھی اپنے ساتھ اٹھا کر لے گیا تھا۔ پولیس نے اس واقعے کا مقدمہ نبی بخش تھانے میں درج کیا تھا، جس کی مزید تفتیش جاری ہے۔