اسرائیلی حملے میں غزہ کی اسلامی یونیورسٹی تباہ، عملے کے ارکان سمیت 3 افراد جاں بحق

غزہ شہر میں واقع اسلامی یونیورسٹی پر اسرائیلی ڈرون حملے کے نتیجے میں انتظامی عملے کے 3 ارکان جاں بحق جبکہ 8 افراد زخمی ہو گئے۔ غیر ملکی خبر رساں اداروں کے مطابق حملے کے وقت یونیورسٹی میں طلبہ کی کلاسز جاری تھیں، جس کی تصدیق اسپتال انتظامیہ اور یونیورسٹی کے عملے نے بھی کر دی ہے۔

یونیورسٹی کے عملے سے وابستہ ذرائع نے بتایا کہ جاں بحق ہونے والے افراد کا تعلق انتظامی عملے سے تھا جبکہ زخمی ہونے والوں میں طلبہ بھی شامل ہیں۔ غزہ کی وزارتِ تعلیم نے اس لرزہ خیز حملے کی شدید مذمت کرتے ہوئے کہا ہے کہ طلبہ اور تعلیمی اداروں کو نشانہ بنائے جانے پر عالمی برادری کی مجرمانہ خاموشی ایسے روح فرسا واقعات کے تسلسل کی حوصلہ افزائی کر رہی ہے۔

دستاویزات اور وزارتِ تعلیم کے جاری کردہ بیان کے مطابق غزہ کا اعلیٰ تعلیمی شعبہ تباہی کے آخری دہانے پر پہنچ چکا ہے اور جاری جنگ کے نتیجے میں تعلیمی اداروں کی 95 فیصد عمارتیں شدید نقصان کا شکار ہو چکی ہیں۔ بیان میں مزید بتایا گیا ہے کہ گزشتہ 6 روز کے دوران ہونے والے اسرائیلی حملوں میں 10 طلبہ اور اساتذہ اپنی جانیں گنوا چکے ہیں۔

دوسری جانب غزہ کی سول ڈیفنس ایجنسی کے مطابق اتوار کے روز غزہ کے دیگر مختلف علاقوں میں ہونے والے پے در پے حملوں کے نتیجے میں مزید 4 شہری جاں بحق ہوئے۔ اس حوالے سے جب اسرائیلی فوج سے مؤقف جاننے کے لیے رابطہ کیا گیا تو ان کا کہنا تھا کہ انہیں حملے سے متعلق اطلاعات موصول ہو چکی ہیں اور وہ اس کا جائزہ لے رہے ہیں۔ واضح رہے کہ غزہ میں جاری طویل جنگ کے دوران جامعات، اسکولوں اور دیگر اہم شہری تنصیبات کو منظم طریقے سے نشانہ بنایا جا رہا ہے۔