سرخی: کشمیری رہنماؤں اور انسانی حقوق کے کارکنوں کی طویل قید باعثِ تشویش ہے، وزیراعظم

وزیراعظم شہباز شریف نے کہا ہے کہ 27 اکتوبر 1947 کشمیر کی تاریخ کا ایک المناک دن ہے، جب سے کشمیری عوام اپنے حقِ خودارادیت کے حصول کے لیے جدوجہد کر رہے ہیں۔ انہوں نے عالمی برادری پر زور دیا کہ کشمیریوں کو اقوام متحدہ کی قراردادوں کے مطابق اپنے مستقبل کا فیصلہ کرنے کا حق دیا جائے۔

یومِ سیاہ کشمیر کے موقع پر اپنے پیغام میں وزیراعظم نے کہا کہ کشمیری عوام کی جدوجہد اور قربانیاں آزادی، وقار اور انصاف کے حصول کے عزم کی عکاسی کرتی ہیں۔ انہوں نے کشمیری سیاسی رہنماؤں اور انسانی حقوق کے کارکنوں کی طویل قید پر بھی تشویش کا اظہار کیا۔

شہباز شریف کا کہنا تھا کہ 5 اگست 2019 کے بھارتی اقدامات نے مقبوضہ جموں و کشمیر کی حیثیت کو متاثر کیا۔ انہوں نے واضح کیا کہ مسئلہ کشمیر کا منصفانہ اور پُرامن حل اقوام متحدہ کی متعلقہ قراردادوں کے مطابق ہونا چاہیے۔

وزیراعظم نے مزید کہا کہ پاکستان کشمیری عوام کی سیاسی، سفارتی اور اخلاقی حمایت جاری رکھے گا۔ ان کے مطابق کشمیری عوام کی امنگوں کو جبر اور دباؤ کے ذریعے ختم نہیں کیا جا سکتا۔

دوسری جانب بھارتی قبضے کے خلاف یومِ سیاہ کے موقع پر دنیا بھر میں کشمیری احتجاجی سرگرمیوں میں حصہ لے رہے ہیں۔ اسلام آباد میں ریڈیو پاکستان چوک سے ڈی چوک تک احتجاجی ریلی نکالنے کا اعلان کیا گیا ہے، جس میں شرکا سیاہ پٹیاں باندھ کر اور سیاہ پرچم اٹھا کر بھارتی اقدامات کے خلاف احتجاج کریں گے۔