کراچی کے علاقے محمود آباد میں بریانی سینٹر پر فائرنگ اور بھتہ وصولی کا مقدمہ درج

کراچی کے علاقے محمود آباد میں کراچی ایڈمن ہاؤسنگ سوسائٹی کے قریب واقع ایک بریانی اینڈ پکوان سینٹر پر نامعلوم ملزمان کی جانب سے فائرنگ اور بھتہ طلب کرنے کا واقعہ پیش آیا ہے، جس کا مقدمہ بریانی سینٹر کے مالک کی مدعیت میں ٹیپو سلطان تھانے میں درج کرلیا گیا ہے۔

درج کردہ مقدمے کے متن کے مطابق، مسلح ملزمان نے بریانی اینڈ پکوان کے دفتر اور فرسٹ فلور پر قائم فیملی ہال کی دیواروں پر فائرنگ کی جس کے نتیجے میں سینٹر کے شیشے ٹوٹ گئے، تاہم اس واقعے میں کوئی جانی نقصان نہیں ہوا۔ ملزمان جائے وقوعہ پر 3 فائر شدہ خول چھوڑ کر فرار ہوگئے جنہیں پولیس نے تحویل میں لے لیا ہے۔

پولیس حکام کے مطابق مقدمے میں بھتہ طلب کرنے، خوف و ہراس پھیلانے اور نقصان پہنچانے سمیت دیگر دفعات شامل کی گئی ہیں۔ مقدمے میں لیاری گینگ وار کے بھتہ گروہ کے سرغنہ وصی لاکھو اور اس کے نامعلوم ساتھیوں کو نامزد کیا گیا ہے۔ ملزمان کی جانب سے جائے وقوعہ پر ایک دھمکی آمیز پرچی بھی پھینکی گئی تھی جس پر لیاری گینگ وار کے وصی لاکھو کا نام درج تھا۔ پرچی میں رابطہ کرنے کی ہدایت کی گئی تھی اور رابطہ نہ کرنے کی صورت میں دستی بم حملے کی دھمکی دی گئی تھی۔

واقعے کے وقت بریانی اینڈ پکوان سینٹر کے ملازمین اپنے کاموں میں مصروف تھے، اور ملازم فہیم نے فائرنگ کے واقعے سے متعلق فون پر مالک کو اطلاع دی تھی۔ ریسٹورنٹ کے مالک نے سی سی ٹی وی کیمروں کی فوٹیج بھی پولیس کے حوالے کردی ہے جس میں فائرنگ سے 5 منٹ قبل ایک مشتبہ موٹر سائیکل سوار کو ریکی کرتے ہوئے دیکھا جا سکتا ہے۔ پولیس نے مقدمہ درج کرکے ملزمان کی تلاش اور مزید قانونی کارروائی شروع کردی ہے۔